انجینئر سید قربان علی شاہ، سپرنٹنڈنگ انجینئر/ سرپرست اعلیٰ لیسکو، فورتھ سرکل اوکاڑہ کی خصوصی ہدایات پر بجلی چوری کی روک تھام کے لیے مؤثر اقدامات کو یقینی بنایا جا رہا ہے۔ اس ضمن میں، ایس ڈی او بصیر پور شفیق ناہرہ نے رات کے وقت چیکنگ کے دوران ایک غیر قانونی ٹیوب ویل کنکشن پر بجلی چوری کی سنگین خلاف ورزی کو بے نقاب کیا۔
اس کارروائی میں صارف سجوار علی وٹو ولد محمد شریف، جو کہ پاکستان کسان اتحاد کے نمائندے ہیں ، کو غیر قانونی طور پر براہ راست بجلی چوری کرتے ہوئے پایا گیا۔ اس صارف کا کنکشن ریفرنس نمبر 45_11463_1378201 ہے، جو میاں محمد منیر ولد میاں محمد امین کے نام پر درج ہے، مگر اس وقت سجوار علی وٹو کے زیر استعمال تھا۔ موقع پر ہی پنجاب پولیس نے سجوار علی وٹو کو گرفتار کر لیا اور متعلقہ تھانے میں اس پر باقاعدہ ایف آئی آر بھی درج کروا دی گئی ہے۔ بجلی چوری کی اس سنگین خلاف ورزی کے بعد، واقعے کی تمام تفصیلات فوری طور پر لیسکو کے اعلیٰ حکام کو ارسال کر دی گئی ہیں تاکہ قانونی کارروائی میں تاخیر نہ ہو۔
لیسکو فورتھ سرکل اوکاڑہ کی جانب سے ایسی کاروائیوں کا مقصد بجلی چوری کی روک تھام اور عوام کو بلا تعطل اور محفوظ بجلی کی فراہمی کو یقینی بنانا ہے۔ مزید برآں، ہدایات جاری کی گئی ہیں کہ مستقبل میں بھی رات کے اوقات میں علاقوں میں اچانک اور بھرپور چیکنگ کا عمل جاری رکھا جائے گا، تاکہ ایسے غیر قانونی اقدامات کا خاتمہ کیا جا سکے۔ عوام سے اپیل کی جاتی ہے کہ وہ بجلی کے استعمال میں قانون کی پابندی کریں اور بجلی چوری کی کسی بھی صورت کی اطلاع فوری طور پر متعلقہ حکام تک پہنچائیں، تاکہ ایک روشن اور محفوظ پاکستان کی تعمیر میں ہم سب اپنا کردار ادا کر سکیں۔
.jpeg)