پی آئی ٹی بی اور الخدمت فاؤنڈیشن کے درمیان SheWins پروگرام کیلئے مفاہمتی یادداشت طے
ایم او یو کے تحت خواتین کو ڈیجیٹل اور کاروباری صلاحیتوں کے ذریعے بااختیار بنایا جائے گا
خواتین کو ڈیجیٹل اور کاروباری مہارتوں کے ذریعے بااختیار بنانے کیلئے پنجاب آئی ٹی بورڈ اور الخدمت فاؤنڈیشن پاکستان کے درمیان مفاہمتی یادداشت طے پا گئی۔ ایم او یو کے تحت پی آئی ٹی بی الخدمت فاؤنڈیشن کو اپنے SheWins پروگرام میں اعلیٰ کارکردگی کی حامل اور مستحق خواتین کا ڈیٹا بیس فراہم کرے گا جبکہ الخدمت فاؤنڈیشن ان خواتین کو لیپ ٹاپ اور موبائل فون سمیت ضروری ڈیجیٹل ٹولز کیلئے بلا سود فنانشل سپورٹ فراہم کرے گی۔ اس ضمن میں الخدمت فاؤنڈیشن کے وفد نے پی آئی ٹی بی چیئرمین فیصل یوسف سے ملاقات کی جو پاکستان کے ڈیجیٹل ایکو سسٹم میں ترقی کو فروغ دینے کی جانب اہم قدم ہے۔ ایم او یو پر پی آئی ٹی بی ڈائریکٹر جنرل ای گورننس ساجد لطیف اور صدر الخدمت فاؤنڈیشن لاہور انجینئر احمد حماد راشد نے دستخط کیے۔ اس موقع پر پی آئی ٹی بی ڈائریکٹر سکلز ڈویلپمنٹ احمد اسلام، الخدمت کے ڈائریکٹر بنوقابل پروگرام لاہور ڈاکٹر عثمان افضل اور ریجنل ہیڈ VMD الخدمت فاؤنڈیشن لاہور معیز بن طاہر بھی موجود تھے۔ اس تعاون کا مقصد خواتین کیلئے وسائل کی رسائی، ڈیجیٹل سکلز کو سیکھنے میں آسانی فراہم کرنے کے ساتھ ساتھ ان کو پاکستان کی ڈیجیٹل معیشت میں اپنا کردار ادا کرنے کے قابل بنانا ہے۔ اس حوالے سے پی آئی ٹی بی چیئرمین فیصل یوسف کا کہنا تھا کہ یہ تعاون ملک بھر میں خواتین کی ڈیجیٹل شمولیت اور ان کو بااختیار بنانے کی جانب اہم قدم ہے اور پی آئی ٹی بی SheWins جیسے پروگراموں اور الخدمت فاؤنڈیشن جیسے شراکت داروں کے تعاون سے آج کے ڈیجیٹل دور میں خواتین کیلئے ترقی کے مزید مواقع فراہم کرنے کیلئے سرگرم عمل ہے۔
.jpeg)